ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន នៅថ្ងៃអាទិត្យនេះបានសម្រាកពីការនឿយហត់នៃការងារមកវាយកូនគោល ដែលសម្ដេចថាដើម្បីអបអរខួប៤៣ឆ្នាំនៃទិវារំដោះ ៧ មករា និងបន្ទាប់ពីបញ្ចប់ការងារប្រកបដោយជោគជ័យនៅប្រទេសមីយ៉ាន់ម៉ា។
នៅព្រឹកថ្ងៃទី៩ ខែមករា ឆ្នាំ២០២២នេះ សម្ដេចតេជោបានសរសេរនៅលើហ្វេសបុកផេករបស់សម្ដេច ដោយភ្ជាប់ជាមួយនឹងរូបថតចំនួន១៧សន្លឹករបស់សម្ដេចនៅលើតារាងវាយកូនគោលថា៖ «វាយកូនគោលដើម្បីអបអរសាទរខួប៤៣ឆ្នាំនៃថ្ងៃរំដោះ៧មករានិងបន្ទាប់ពីការនឿយហត់ប៉ុន្មានថ្ងៃកន្លងមក» ។
ថ្ងៃទី៧ ខែមករា ឆ្នាំ២០២២នេះ គឺជាខួប៤៣ឆ្នាំនៃទិវាជ័យជម្នះ ៧ មករា ដែលរណសិរ្សសាមគ្គីសង្គ្រោះជាតិ បានវាយរំលំរបបប្រល័យពូជសាសន៍ ប៉ុល ពត ដែលនាំឱ្យពលរដ្ឋកម្ពុជាទទួលបានសិទ្ធិសាជាថ្មី និងនាំឱ្យប្រទេសទទួលបានការអភិវឌ្ឍជាបន្តបន្ទាប់ដល់បច្ចុប្បន្ន។
ថ្ងៃទី៧ ខែមករា ឆ្នាំ២០២២នេះផងដែរ សម្ដេចតេជោ ក៏បានធ្វើអោយពិភពលោកភ្ញាក់ផ្អើលចំពោះដំណើរទស្សនកិច្ចរបស់សម្តេចទៅកាន់ប្រទេសមីយ៉ាន់ម៉ា។ ដែលជាលទ្ធផលគឺរដ្ឋាភិបាលយោធាមីយ៉ាន់ម៉ាយល់ព្រមពន្យាបទឈប់បាញ់រហូតដល់ដំណាច់ឆ្នាំ២០២២ សម្រួលដំណើរការទទួលយកជំនួយពីអាស៊ាន ព្រមទាំងសម្របសម្រួលឱ្យប្រេសិតពិសេសអាស៊ានក្នុងដំណើរទស្សនកិច្ចមកមីយ៉ាន់ម៉ាឱ្យបានទៅជួបជាមួយភាគីពាក់ព័ន្ធទាំងអស់នៃជម្លោះក្នុងប្រទេសរួមទាំងអង្គការប្រដាប់អាវុធជនជាតិភាគតិចផងដែរ៕
